Cwestiynau Cyffredin

Hanes y cinio mawr

• Beth yw'r cinio mawr?

  Mae'r Cinio Mawr yn syniad syml iawn sy'n tarddu o Brosiect Eden. Y nod yw cael cynifer a phosibl o'r 61 miliwn o bobl yn y DU i gael cinio gyda'u cymdogion am ychydig oriau o gymdeithas, cyfeillgarwch a hwyl. Ers cychwyn y Cinio Mawr yn 2009, mae miloedd o Giniawau Mawr wedi eu cynnal ym mhob math o gymunedau a chyda miliynau o bobl yn cymryd rhan bob blwyddyn.

• Beth sydd a wnelo'r cinio mawr gyda Phrosiect Eden?

  Cychwynnwyd Y Cinio Mawr gan y Prosiect Eden oherwydd ei fod yn credu ein bod ni'n fwy parod i wynebu pob her pan fyddwn yn eu hwynebu gyda'n gilydd.

  Caiff y Cinio Mawr ei arwain gan y Prosiect Eden, a'i ariannu gan Gronfa Fawr y Loteri a'i chefnogi gan MasterCard a Kingsmill.

• Beth yw dyddiad y Cinio Mawr 2012?
  Cynhelir y pedwerydd Cinio Mawr blynyddol ar ddydd Sul 3 Mehefin 2012
• Beth ddigwyddodd yn 2011?

  Llwyddodd y Cinio Mawr i ysgogi bron i 2 filiwn o bobl i gael cinio gyda'u cymdogion ledled y DU. Gallwch ddarllen eu straeon yma neu wirio'r lluniau ar flickr a facebook.

• A ddylwn i gofrestru fy nigwyddiad?
  Dylech! Os ydych chi'n cynnal Cinio Mawr yn 2012,, rydym ni am glywed amdano. Byddwn yn anfon pecyn cymorth am ddim atoch os byddwch chi'n dweud wrthym am eich Cinio Mawr.
• Oes rhaid iddo fod yn barti anferth?
  Dim o gwbl. Roedd sawl digwyddiad yn ystod dwy flynedd gyntaf Y Cinio Mawr yn ddim mwy na dau neu dri o gartrefi'n dod at ei gilydd. Y cyfan sydd ei angen arnoch yw un gwestai. Byddem yn falch o glywed am eich digwyddiad serch hynny fel rhan o'r mudiad cenedlaethol!
  
• Pa ddefnyddiau allwch chi eu rhoi i ni?
  Byddwn yn anfon pecyn cymorth am ddim atoch os byddwch chi'n dweud wrthym am eich Cinio Mawr. Gallwch lawr lwytho adnoddau hefyd megis posteri a phamffledi, a gallwch eu haddasu gyda manylion eich Cinio Mawr.
• Sut all fy ysgol i helpu?

  Plant, rhieni ac athrawon, mae ar Y Cinio Mawr eich angen chi! Gall ysgolion naill ai gynnal eu Ciniawau Mawr eu hunain, neu helpu eu disgyblion i baratoi ar gyfer Cinio lleol, er enghraifft, drwy wneud addurniadau a bwyd, neu dyfu llysiau. Mae nifer o syniadau yn ein hadran ysgolion ac ieuenctid.

• Sut all fy ngwaith/busnes gymryd rhan?

  Os oes gennych fusnes eich hun, pam na wnewch chi gynnal Cinio Mawr ar eich eiddo, neu roi diwrnod i ffwrdd i'ch staff i gymryd rhan? Gallech ddod o hyd i le yn y ffreutur, y maes parcio, neu hyd yn oed ar do'r ffatri i gynnal eich Cinio.

• Alla i godi arian at elusen yn y Cinio Mawr?

  Cewch, wrth gwrs! Gadewch i ni wybod faint o arian a godwyd a gallwn ni rannu hynny gyda phobl y Cinio Mawr ledled y wlad. Mewn gwirionedd, defnyddiodd 10% o'r trefnwyr eu Cinio Mawr fel cyfle i godi arian at elusen!

• Rydym ni'n sefydliad; allwn ni gymryd rhan mewn Cinio Mawr neu ei gefnogi?

  Cewch! Os ydych chi eisiau cyngor ynglŷn â ffurfio partneriaeth gyda'r Cinio Mawr, e-bostiwch ni ar gwybodaeth@thebiglunch.com

Trefnu eich Cinio

• Pa bryd ddylwn i ddechrau trefnu?
  Pan fyddwch chi'n barod. Mae'n dibynnu wir ar y syniadau sydd gennych mewn golwg. Os ydych yn gobeithio cael digwyddiad mawr a chau eich stryd, yna mae'n syniad da cysylltu gyda'r cyngor lleol cyn gynted â phosibl, gan fod rhai cynghorau angen hyd at 12 wythnos o rybudd. Mae'n syniad da hefyd i greu diddordeb yn y gymuned ychydig o fisoedd ymlaen llaw fel y bydd gan bobl amser i fod yn rhan o'r trefniadau a'r cynlluniau gyda chi.
• Beth os nad oes Cinio Mawr wedi ei drefnu yn fy ardal i ar gyfer 2012?
  Trefnwch eich cinio eich hun! Efallai y gallech ddod o hyd i rywun ar y stryd sydd eisiau dod o ddrws i ddrws gyda chi i weld pwy arall sydd â diddordeb.
• Oes yna unrhyw arian ar gael?
  Nid ydych angen llawer o arian i fwynhau eich hunain gyda'ch cymdogion, ond mae rhai grantiau ac arian y gallwch wneud cais amdano. Cysylltwch gyda'ch Sefydliad Cymunedol i weld a oes rhywbeth yn eich ardal chi, neu holwch Arian i Bawb. Ceisiwch chwilio ar y rhyngrwyd am gyfleoedd am arian lleol. Cofiwch y bydd gan sawl cynllun ddyddiad cau cynnar ar gyfer derbyn ceisiadau a bydd angen cofnodion ynglŷn â sut y cafodd yr arian ei wario, felly byddwch yn barod.
• Faint fydd hyn yn gostio?

  Does dim rhaid i'r Cinio Mawr fod yn ddrud. Gallech gynnal un yn eich gardd (gan osgoi talu unrhyw daliadau i'r cyngor/yswiriant), gofyn i bobl ddod a bwyd, gwneud eich addurniadau eich hunain a benthyca dodrefn.

  Os ydych yn trefnu digwyddiad mawr, gallech gychwyn cronfa gyda'r cymdogion sydd â diddordeb a chreu blwch cyfraniadau ar y diwrnod er mwyn cael yr arian yn ôl, neu hyd yn oed drefnu raffl.

• Oes angen yswiriant?
  Efallai y bydd eich cyngor yn gofyn i chi dalu ffioedd am gau'r stryd neu fe fyddant yn gwneud cais i chi gymryd yswiriant atebolrwydd cyhoeddus gan eich bod yn cau tir cyhoeddus a'ch bod yn gyfrifol am yr hyn sy'n digwydd. Rydym yn ceisio perswadio cynghorau i beidio â chodi tâl. Ond os byddwch chi angen yswiriant, yna mae'r cwmnïau canlynol yn cynnig yswiriant Parti Stryd penodol. Event Insurance Services Street Parties neu Event Assured Street Party Insurance.
• Ydy barbeciws yn rhy beryglus o ran iechyd a diogelwch?
  Defnyddiwch synnwyr cyffredin. Gosodwch eich barbeciw yn rhywle diogel a chael un cogydd i fod yn gyfrifol am bethau, nid pawb ar draws ei gilydd. Mae'n syniad da cael rhywun i fod yn gyfrifol am gymorth cyntaf ar y diwrnod.
• Rwy'n poeni am hylendid bwyd, oes angen trwydded arnom ni?
  Dylai trefnu digwyddiadau bychan, partïon stryd preifat a digwyddiadau cymunedol fod yn syml ac nid oes angen pethau fel asesiadau risg, trwyddedau na thystysgrifau iechyd a diogelwch fel arfer. Dylai pawb sy'n cymryd rhan mewn Cinio Mawr fod yn gyfrifol amdanynt eu hunain a dylai'r rhai sy'n paratoi bwyd wneud hynny mewn amgylchedd glân ac iach. Os ydych yn trefnu digwyddiad mwy y gall unrhyw un ei fynychu, neu os ydych yn gwerthu tocynnau i'ch digwyddiad, yna efallai y bydd prosesau a gofynion eraill y dylech eu hystyried. Bydd eich cyngor lleol yn gallu eich cynghori.
• Oes angen i mi gau fy stryd?
  Nac oes! Gallwch gynnal eich Cinio ar unrhyw ddarn o dir neu bydd adeilad yn gwneud y tro, megis gardd gymunedol, preifat neu mewn tafarn parc lleol, lôn fynedfa, cae chwarae'r ysgol, eglwys, mosg, synagog neu deml. Os ydych am gau eich stryd bydd angen i chi gysylltu ag adran y priffyrdd yn eich cyngor lleol er mwyn gweld sut mae gwneud hynny. Mae'n syniad da gwneud hynny cyn gynted â bo modd gan fod ar rai cynghorau angen rhybudd o 12 wythnos. Os cewch unrhyw drafferth gyda'ch cyngor, e-bostiwch ni ar gwybodaeth@thebiglunch.com ac efallai y gallwn ni helpu.
• Pwy fydd yn tacluso ar ôl y Cinio?
  Ceisiwch gynllunio ymlaen llaw er mwyn rhannu'r gwaith tacluso, a lle bynnag bo modd, ceisiwch ailgylchu neu ailddefnyddio'r hyn sydd ar ôl.
• Ar beth fyddwn ni'n eistedd ac yn bwyta?
  Gallech ddefnyddio eich stolion, cadeiriau, cratiau a byrddau trestl eich hunain. Os oes angen i chi brynu mwy o gadeiriau a byrddau, chwiliwch ar eBay, Freecycle neu Freegle am rai rhad/am ddim. Gallech ymuno a grŵp rhoi a benthyg, megis Ecomodo, er mwyn rhannu'r pethau sydd eu hangen arnoch.